ಮುರ್ಡೇಶ್ವರದಲ್ಲಿ ಬೆಳ್ಳಂ ಬೆಳಿಗ್ಗೆ ಮನೆ ಕಳ್ಳತನ: ೮ಲಕ್ಷ ೬೫ಸಾವಿರ ಮೌಲ್ಯದ ಬಂಗಾರ ನಾಪತ್ತೆ

ಭಟ್ಕಳ: ಮನೆಯಲ್ಲಿ ಯಾರೂ ಇಲ್ಲದ ಸಮಯದಲ್ಲಿ ಒಳನುಗ್ಗಿದ ಕಳ್ಳರು ಮನೆಯಲ್ಲಿ ಕಪಾಟಿನಲ್ಲಿದ್ದ ಸುಮಾರು ೮ ಲಕ್ಷ ೬೫ ಸಾವಿರ ರೂ. ಮೌಲ್ಯದ ಚಿನ್ನವನ್ನು ಕದ್ದು ಪರಾರಿಯಾದ ಘಟನೆ ಮುರುಡೇಶ್ವರದ ಹೆರಾಡಿ ಬಳಿ ನಡೆದಿದೆ.

ಶಿಕ್ಷಕರಾದ ಗಜಾನನ ಗಣಪತಿ ನಾಯ್ಕ ಇವರ ಮನೆಯಲ್ಲಿ ಈ ಕಳ್ಳತನ ನಡೆದಿದ್ದು ಇವರು ಅ. ೨೩ರಂದು ತಮ್ಮ ಕುಟುಂಬದ ಜೊತೆಗೆ ಹೊನ್ನಾವರದ ಮೂಲ ಮನೆಗೆ ಹೋಗಿ ಮಾರನೇ ದಿನ ಸಂಜೆ ಮನೆಗೆ ವಾಪಾಸ್ಸು ಬಂದಾಗ ಕಳ್ಳತನವಾದ ವಿಷಯ ತಿಳಿದಿದೆ.

ಕಳ್ಳರು ಮನೆಯ ಹೊರಗಿನ ಬಾಗಿಲು ಮುರಿದು ಮನೆಯ ಒಳ ನುಗ್ಗಿ ಬೆಡ್ ರೂಮಿನ ಬೀಗವನ್ನು ಮುರಿದು ಕಪಾಟಿನ ಬಾಗಿಲು ಹಾಗೂ ಲಾಕರ್ ಒಡೆದು ಅದರಲ್ಲಿದ್ದ ೧೭೩ ಗ್ರಾಂ ತೂಕದ ಕರಿಮಣಿ ಸರ, ೩ ಚೈನ್, ೩ ಕಿವಿಯೋಲೆ, ೧೫ ಉಂಗುರ ಸೇರಿದಂತೆ ವಿವಿಧ ಮಾದರಿಯ ಚಿನ್ನದ ಆಭರಣ ಹಾಗೂ ೩೫ ಸಾವಿರ ರೂ ನಗದು ಹಣವನ್ನು ಕದ್ದು ಪರಾರಿಯಾಗಿದ್ದಾರೆ.

ಮುರುಡೇಶ್ವರ ಪೊಲೀಸರು ತಕ್ಷಣ ಸ್ಥಳಕ್ಕೆ ಆಗಮಿಸಿ ಶ್ವಾನದಳ ಹಾಗೂ ಬೆರಳಚ್ಚು ತಂಡವನ್ನು ಕಾರವಾರದಿಂದ ಕರೆಯಿಸಿ ಪರಿಶೀಲನೆ ನಡೆಸಿದ್ದಾರೆ. ಸಿ.ಪಿ.ಐ. ದಿವಾಕರ ಮರ‍್ಗರ‍್ಶನದಲ್ಲಿ ಮುರುಢೇಶ್ವರ ಠಾಣಾ ಪಿ.ಎಸ್.ಐ. ರವೀಂದ್ರ ಬಿರಾದಾರ ತನಿಖೆ ಕೈಗೊಂಡಿದ್ದಾರೆ.