ಶಾರದಾಂಬಾ ಶಿಲಾಲಯಕ್ಕೆ ಶಿಲಾನ್ಯಾಸ

ಹೊನ್ನಾವರ ನಗರದ ಮಧ್ಯಭಾಗದ ಚಾರೋಡಿ ಮೇಸ್ತ ಸಮಾಜಕ್ಕೆ ಸೇರಿದ ಶ್ರೀ ಶಾರದಾಂಬಾ ಚಂದ್ರಮೌಳೀಶ್ವರ ದೇವಾಲಯದ ಶಿಲಾಮಯ ನೂತನ ಕಟ್ಟಡ ನಿರ್ಮಾಣಕ್ಕೆ ಹಿರಿಯ ಸಾಮಾಜಿಕ ಕಾರ್ಯಕರ್ತ ಡಾ| ಜಿ.ಜಿ. ಸಭಾಹಿತ ಶಿಲಾನ್ಯಾಸ ನೆರವೇರಿಸಿದರು.

ನಂತರ ಮಾತನಾಡಿದ ಅವರು, ಧಾರ್ಮಿಕ ಕೇಂದ್ರಗಳು ಸುಸಜ್ಜಿತವಾಗಿದ್ದರೆ ಸಮಾಜಕ್ಕೆ ಕ್ಷೇಮ, ಇಂತಹ ದೇವಾಲಯಗಳು ಸಮಾಜದ ಒಗ್ಗಟ್ಟಿಗೆ, ಅಭಿವೃದ್ಧಿಗೆ ಕಾರಣವಾಗುತ್ತದೆ. ಚಾರೋಡಿ ಮೇಸ್ತ ಸಮಾಜದವರು ಸಂಕಲ್ಪಿಸಿದ ಈ ದೇವಾಲಯ ಮೂಲದಲ್ಲಿ ಶೃಂಗೇರಿ ಶ್ರೀಗಳಿಂದ ಪ್ರತಿಷ್ಠಾಪಿಸಲ್ಪಟ್ಟಿತು. ಎಲ್ಲ ಸಮಾಜದವರು ಭಕ್ತಿಯಿಂದ ನಡೆದುಕೊಳ್ಳುವ ಈ ದೇವಾಲಯದ ಕೆಲಸ ಬೇಗ ಮುಗಿದು ಸಮಾಜ ಉನ್ನತಿಗೊಳ್ಳಲಿ ಎಂದು ಹಾರೈಸಿದರು.
ಉದ್ಯಮಿ ಜೆ.ಟಿ. ಪೈ ಮಾತನಾಡಿ, ಸಾಹಸಿ ಸಮಾಜದ ಏಳ್ಗೆಗೆ ದೇವಾಲಯ ಕಾರಣವಾಗಲಿ, ಧಾರ್ಮಿಕ ಭಾವನೆ ಎಲ್ಲ ಸಮಾಜದಲ್ಲಿ ತುಂಬಲಿ ಎಂದು ಹಾರೈಸಿದರು.
ವಿದ್ವಾಂಸ ಪತಂಜಲಿ ವೀಣಾಕರ ಮಾತನಾಡಿ, ಶಾಸ್ತೊçÃಕ್ತವಾಗಿ ನಿರ್ಮಿಸಲ್ಪಡುವ ಈ ದೇವಾಲಯಕ್ಕೆ ಎಲ್ಲರೂ ಸಹಕಾರ ನೀಡಬೇಕೆಂದು ಹೇಳಿದರು.
ಟ್ರಸ್ಟಿಗಳಾದ ಲಕ್ಷ್ಮಣ ಜಾಯಾ ಮೇಸ್ತ, ಅಚ್ಚುತ ದೇವಪ್ಪ ಮೇಸ್ತ ಮತ್ತು ಚಾರೋಡಿ ಮೇಸ್ತ ಸಮಾಜದ ಗಣ್ಯರು ಉಪಸ್ಥಿತರಿದ್ದರು. ಗೋಕರ್ಣದ ಕೃಷ್ಣ ಭಟ್ಟ ಷಡಕ್ಷರಿ ಧಾರ್ಮಿಕ ಕಾರ್ಯಕ್ರಮ ನೆರವೇರಿಸಿದರು.